آه يا زماني من القلوب القاسية       دارت دورة، دورة خاويــة

آه يا زماني من لوراق الرّاشية       دارت دورة بالحروف الغاوية

آه يا زماني من السواق الكاوية      دارت دورة و فالحفرة  هاوية

فگوسة عوجة زريعتها لاويـة      دارت دورة  بيها مـا ساخية

شدّات لحبل و للفقصة  ناويـة     و احكاتها قصة، قصة داميـة

قصة عيون بدموعها  شاكية

قصة شمعة ما عادت ضاوية

و قصة حرف  نقاطو طافية

آه يا زماني من القلوب القاسية      دارت دورة، دورة خاويــة

غرقات فـليل نجومو عـارية      و رسات  فبحر مواجو غارية

كشرات على نابها بضحكة نابية

و شطحات شطحة و گالت هانية

تبعوها عقول عيونهم عامية

و نساو نهار حسباتو حامية

آه يا زماني من القلوب القاسية      من برّا لْوان  والدواخل باغية

النفوس تــاهت تلهت طاغية      تجري مور  لسباب الخـاوية

الريوس كيف الذياب العاويـة       تاكل ما تشبع  و ديما نـاسية

و نسات  نهار حسباتو حامية

آه يا زماني من القلوب القاسية      فين دم لعروق  فين مـاشية

فين تصب واش من واد هي راسية

خايف عليها من تلفة ماجية

أوعدي أوعدي من لقلوب القاسية