خير وسلام

كتبهاإدريس الهگار التازي ، في 5 أبريل 2009 الساعة: 18:03 م

———————————————
خير وسلام

خير و سلام
و أنا غارق فلحلام
بان لي فمنامي خيال
شد على يدي
و باسني من الجبين
و گالي:
يا سي دريس علاش تنين
مالك و هاذ الحزة
غوت بالعلالي و گاد الرزة

و لا تخاف من كلام

و نهار طلع النهار
شعري وقف و لساني مرار
و ما عرفت منين نزلات الضربة
غير زيرت راسي بالعصبة
و جدبت كيف العادة ديك الجدبة
و جمعت حروفي بالزربة
و اخترت منها ما هو قاطع و زين
زجل حفظتو من كنانش الوالدين
و زرعتو فكيسان المحبة
نفرقو عليكم واحد واحد
ويشيط الخير
و اللي شاط
كتبتو قصيدة
عنوانها قصايد
كلام ما ناقص ما زايد
سمعوه يا لخوان
و گولو لي واش كلامي ميزان

الحاضر يحكي للغايب

قلبي يا لحباب راهو طايب
و عقلي فتخمامو دايب
و حسابي تالف و عايب
غير ضربت السداسي فالرباعي
و عزمت بالخط الزناتي
و بخرت بالجاوي المكاوي
و ما لگيت شكون ينصح
و شكون يخاوي
و لا اللي يشد الميزان و يساوي
المرض خمر و لا طبيب يداوي

و جريت البطانية و جريت لحصير
ما الگيت صرجم و ما الگيت سرير
الگيت ليزار فواد و المخده فبير
بير عميق سواريه قصدير ضرير
ساسو خشب راشي و خبزو فطير
طريقو عوجة حفيانة بلا صباط بلا سير

سير و سير
بين الزناقي زاد يا لحباب حماقي
ودخت دوخة ريحتها بكات عماقي
مدادي ساح ، شربتو و عمرو وراقي
و تهت بين لمواج و نلهت بين السواقي
و گلت هنا ، هنا نلگ اللي يفهم شواقي

و عيطت على رجال لبلاد
الزفت داب و الكاس فاض
و عيطت ألولاد ألولاد
أنا خايف من الغيم إلى عام
أنا خايف من الضيم إلى ضام
شبعنا بخور ودبالت لهضور
جرو لبطاطن جرو لحصور
نكشفو السر
و نصفيو ما ذاك البير
و نصفيو ما ذاك البير

كتبهاإدريس الهگار التازي، في 5 April 2009 17:51 PM———————————————

أضف الى مفضلتك